Drie tieners is in hegtenis geneem ná ‘n skoolinbraak

Drie tieners, tussen 14 en 16 jaar oud, is in hegtenis geneem vir diefstal ná ’n inbraak by ’n laerskool in Reddersburg in die Vrystaat.

Volgens die polisie is verskeie Samsung-tablette, wat deur leerders gebruik word, uit die skool se biblioteek gesteel.

Die verdagtes het glo toegang verkry deur ’n venster te breek.

’n Opsporingsoperasie is onmiddellik van stapel gestuur, wat gelei het tot die arrestasie van die drie tieners en die terugvind van 11 tablette met ’n geskatte waarde van R27 500.

Die polisie sê die tieners is ingevolge die Kinderwet in die sorg van hul ouers of voogde vrygelaat en sal na verwagting op 19 Mei in die Reddersburg-landdroshof verskyn.

Sewe tablette is steeds soek, en ondersoek duur voort.

Ter illustrasie. FOTO: Grok