Drie vermeende verkragters is in Bloemfontein vasgetrek

Drie vermeende verkragters is die afgelope paar dae in Bloemfontein in hegtenis geneem.

'n 47-jarige man, Deon Joshua, is in Bergman aangekeer nadat 'n lasbrief reeds verlede jaar vir sy inhegtenisneming uitgereik is in verband met 'n verkragtingsaak in Bloemspruit.

Die span het ook 'n 14-jarige verdagte opgespoor wat na bewering sedert 2022 arrestasie ontduik het in verband met 'n afsonderlike verkragtingsaak.

Nog 'n verdagte is in Fase 7 aangekeer. Hy word daarvan verdink dat hy in 2017 'n verstandelik gestremde vrou in Bloemspruit verkrag het.

Al drie verdagtes sal na verwagting binnekort in die Bloemfonteinse Landdroshof op hul onderskeie aanklagte verskyn.

Polisiewoordvoerder, sersant Mahlomola Kareli, sê die inhegtenisnemings is die gevolg van deeglike intelligensiegedrewe ondersoeke en die samewerking van gemeenskapslede wat inligting aan die polisie verskaf het.

Ter illustrasie. FOTO: Facebook