Duisende by ’n Rio-konsert is van ’n bomaanval gespaar

’n Beplande bomaanval op Lady Gaga se konsert in Rio de Janeiro is verhoed. Reuters berig die konsert het Saterdag op Copacabana-strand plaasgevind en het glo meer as 2,1 miljoen mense gelok. Die Brasiliaanse polisie sê hulle het ondersoek ingestel ná ’n wenk oor digitale groepe wat gewelddadige gedrag onder tieners aanmoedig. Dié groepe het glo minderjariges gewerf om plofstof en selfgemaakte brandbomme – sogenaamde Molotov-cocktails – te gebruik. ’n Verdagte wat as die groep se leier beskryf word, is in hegtenis geneem. ’n Tiener is ook in Rio de Janeiro aangehou. Owerhede het beslagleggingsoperasies in verskeie gebiede uitgevoer.