Geliefde skrywer Madelein Rust sterf aan kanker

Die geliefde Afrikaanse skrywer Madelein Rust is in die ouderdom van 58 aan kanker oorlede.

Rust is in 2015 met borskanker gediagnoseer, en in Januarie 2020, ná byna vyf jaar in remissie, is sy met terminale kanker gediagnoseer.

Met vorige onderhoude met Maroela Media het sy gesê met hulp van bo het sy met elke terugslag meer hardekwas teenoor die siekte geword.

Rust het die plaaslike boekbedryf – en meer spesifiek die misdaadfiksie-genre – in Julie 2014 met haar debuutroman Die 13de kaart oorrompel. Dié boek het op Nielsen se internasionale topverkoperlys gepryk, en dit is later vir ʼn ATKV-Woordveertjietoekenning vir spanningsliteratuur benoem.

Haar twee outobiografieë – Kanker Schmanker en Van Vrees na Vrede – handel oor haar stryd met kanker. Laasgenoemde het sy gehoop mense na God sal lei.