Gesondheidsinspeksies by Bloemfontein-pakhuise gedoen

Die Mangaung Metro Munisipaliteit se interdepartementele span wat Omgewingsgesondheid, Wetstoepassing en die Suid-Afrikaanse Polisiedienste (SAPD) insluit, het 'n gesondheidsinspeksie by pakhuise in Bloemfontein se sentrale besigheidsdistrikte gedoen. Dit volg ná die onlangse voorval van voedselvergiftiging wat daartoe gelei het dat 43 leerders gehospitaliseer is weens die beweerde inname van giftige versnaperinge en sjokolade. As gevolg van hierdie ernstige bevindings is Madiba Hawkers, hangende die aansoek en goedkeuring van die sertifikaat van aanvaarbaarheid, gesluit. Volgens die departementshoof vir gemeenskapsdienste moet alle verspreidingsentrums wat ongelisensieerde produkte verkoop, en dié wat nie behoorlike dokumentasie kan lewer nie, gesluit word om die verkoop van besmette produkte te vermy.