Inwoners is ontsteld ná skote en geraas by 'n matriekafskeid in Bloemfontein

Saamgestel deur Armando Pieters

Oct 10

1 min read

Inwoners van Langenhovenpark in Bloemfontein het hul misnoeë uitgespreek nadat skote glo tydens ’n matriekafskeid in die gebied afgevuur is.

Volgens Netwerk24 het inwoners ook gekla oor harde motorfietse, verkeer en ander geraas wat met die skool se matriekafskeid by die Leopard & Lace-venue gepaardgegaan het.

Een inwoner sê dat die geraas reeds omstreeks vyfuur Donderdagmiddag begin het en dat die polisie twee keer ontbied is. Sy beweer ook dat voertuie voor inwoners se opritte geparkeer is en dat sommige mense wat hulle daaroor aangespreek het, gevloek het.

Ander inwoners sê die geraas het diere in die omgewing ontstel en dat verkeer tydelik by ’n verkeerslig opgehou is sodat ’n konvooi kon deurgaan.

Die skool sê hy is van die voorval bewus en volg dit op. Die polisie sê daar is egter geen klag oor die gebeure ontvang nie.