Iran vuur meer as 180 missiele op Israel af

Iran het meer as 180 missiele na Israel gelanseer in ‘n grootskaalse aanval wat die vrese vir ‘n algehele streekoorlog verder verhoog. Miljoene mense het na skuilings gehaas voordat ontploffings Dinsdagaand die naghemel bo Tel Aviv en Jerusalem verlig het. Paramedici sê twee mense is lig deur skrapnel beseer. Die Israeliese weermag sê die meeste van die missiele is met die hulp van die VSA onderskep, maar dat daar ‘n klein aantal trefslae was. Israel beskuldig Iran van ‘n gevaarlike eskalasie van die konflik in die streek en waarsku teen gevolge.