Jerobejin se familie sal uiteindelik geregtigheid sien

Meer as twee jaar nadat Jerobejin van Wyk se moord die slaperige Weskusdorpie Klawer geskok het, sal die 13-jarige se familie na verwagting uiteindelik geregtigheid sien. Eyewitness News berig uitspraak word in die saak teen Daniel Smit, wat verlede week skuld beken het op al vyf aanklagte teen hom, insluitend moord, ontvoering en die skending van 'n liggaam, verwag. Die 13-jarige seun is in 2022 vermoor nadat hy en 'n vriend daarvan beskuldig is dat hulle vrugte van die 58-jarige se eiendom gesteel het. Voorsitter van die polisie se portefeuljekomitee, Ian Cameron, het gesê dit is van kritieke belang dat Suid-Afrikaners meer uitgesproke oor geweld teen kinders raak. Hy voeg by dat hierdie saak die howe die geleentheid bied om 'n voorbeeld te stel dat moord en die neem van die reg in eie hande nie geduld kan word nie.