Jong kameelperd in die Vrystaat stap weer na ’n baanbreker-operasie

’n Jong kameelperd, wat aanvanklik min kans op oorlewing gehad het ná ’n ernstige beenbesering, stap nou net een week ná baanbrekerschirurgie weer saam met sy trop. Volgens die Universiteit van die Vrystaat (UV) se webblad was hierdie merkwaardige herstel moontlik danksy ’n gekoördineerde reddingspoging met kundiges van regoor die wêreld. Volgens prof. Francois Deacon van die UV het die operasie op 19 Februarie op ’n afgeleë wildsplaas tussen Dealesville en Boshof plaasgevind. Die plaas se eienaar het die beseerde kameelperd opgemerk en dadelik dr. Andri Grobbelaar, ’n UV-navorser oor kameelperdgesondheid, gekontak.