Kanker eis nog ’n Vrystatertjie

’n Sesjarige seun van Hennenman in die Vrystaat se lewe word dié week onthou ná hy aan kanker oorlede is.

Netwerk24 berig Emmie Schoeman, ’n graad 2-leerder, is vroeër die week oorlede ná ’n lang en moeilike stryd teen retinoblastoom—’n seldsame en aggressiewe oogkanker wat veral jong kinders raak.

Hy is op vyfjarige ouderdom gediagnoseer en het behandeling in Bloemfontein ontvang, insluitend chemoterapie, bestraling en ’n stamseloorplanting.

Hoewel hy vir ’n kort tydperk in remissie was, het die kanker later na sy brein en rugmurg versprei.

Sy ma sê Emmie was ’n energieke en liefdevolle kind wat ’n groot droom gehad het om eendag ’n weermagman te word.

Intussen volg sy dood kort op berigte oor nóg ’n jong Vrystaatse kind, Leandré Lottering van Senekal, wat ook onlangs haar stryd teen dieselfde vorm van kanker verloor het.

Emmie Schoeman. FOTO: Netwerk24