Kieswetter maak gereed om uit die SAID te tree

Die kommissaris van die Suid-Afrikaanse Inkomstediens, Edward Kieswetter, maak gereed om uit te tree wanneer sy verlengde termyn volgende jaar eindig.

Hy het in ’n interne boodskap aan personeel gesê hy betree sy laaste maande en werk saam met minister van finansies, Enoch Godongwana, om ’n gladde leierskapsoorgang te verseker.

Kieswetter het sedert sy aanstelling in 2019 die inkomstediens herbou, kern-eenhede herstel en tegnologie soos outo-assesserings ingestel. Hy het rekordinkomste ingesamel, ten spyte van uitdagings soos COVID-19 en ’n krimpende belastingbasis.

Sy laaste taak is om R50 miljard in te samel om ’n begrotingstekort te dek.