KZN is bekommerd oor die getal mense wat deur gure weer ontwortel is

Die KwaZulu-Natalse Departement van Samewerkende Regering het kommer uitgespreek dat die getal mense wat deur gure weer geraak of ontwortel is, sal toeneem.

SABC-nuus berig die provinsie het begin met opruimingswerk in gebiede wat deur 'n erge donderstorm getref is. Volgens berigte is daar veral in die Emadlangeni-, Dannhauser- en Newcastle-munisipaliteite in die middelland groot skade aangerig, en woonplekke sowel as staatsinfrastruktuur is beskadig of vernietig.

Die KwaZulu-Natalse Departement van Gesondheid verwag intussen dat gesondheidsorg ontwrig kan word by instellings in die Amajuba-distrik.

Die naweek se storm het 'n deel van die Madadeni-nooddienste se basis en die Niemeyer-gedenkhospitaal beskadig, en onder meer 'n dak van die buitepasiëntafdeling sowel as die ongevalle-opnamekantoor afgewaai.

Die nedersetting Newcastle is ook hard getref. FOTO: Facebook/Newcastle Munisipaliteit