Letsoha-Mathae wil pakke verruil vir oorpakke en stewels

Die Vrystaatse premier, MaQueen Letsoha-Mathae, het lede van haar Uitvoerende Raad aangesê om ná die begrotingsdebatte hul kant te bring. Volgens ’n plasing op die Vrystaatse regering se Facebook-blad het sy Dinsdag by die Vierde Raadsaal in Bloemfontein gesê fyn pakke en rokkies moet plek maak vir oorpakke en veiligheidsskoene. Sy maan hulle om minder tyd in kantore te spandeer en meer teenwoordig in gemeenskappe te wees. Die LUR vir samewerkende regering, tradisionele sake en behuising het die premier se oproep gesteun en gesê LUR’e moet minder praat en meer doen om gemeenskappe se vertroue te wen.