Malatsi moet sy swartbemagtiging besluit verdedig

Kommunikasieminister Solly Malatsi beantwoord op Dinsdag 27 Mei vrae oor sy besluit om sekere swartbemagtigingsvereistes te verslap. Eyewitness News berig dit volg nadat hy ’n regulasie gepubliseer het wat toelaat dat faktore soos koste oorweeg word, eerder as slegs swart ekonomiese bemagtiging. Dit sal onder meer Starlink, Elon Musk se satelliet-internetdiens, help om in Suid-Afrika te funksioneer. Die besluit is reeds as die “Starlink-gazette” beskryf en het skerp kritiek ontlok. Die voorsitter van die kommunikasieportefeuljekomitee, Khusela Diko, meen dit is moontlik in stryd met die Wet op Elektroniese Kommunikasie. Organisasies soos Public Interest SA het ook kommer uitgespreek. Malatsi sê egter sy besluit bring beleidsduidelikheid en kan belegging in die sektor bevorder.