MIDDAG SPORT: Die Cheetahs bly tuis in die Curriebeker-halfeindronde, Kapp kritiseer die byvoeging van ‘n transgender Australiese speler en, Woods verloor sy lisensie
Ons skop af met rugby: Die Suzuki Griquas speel die naweek tuis teen die Fidelity ADT Lions, terwyl die Toyota Cheetahs die Airlink Pumas in Bloemfontein verwelkom in die halfeindstryd van die Carling Curriebeker se Premierafdeling.
Albei halfeindstryde vind Sondag plaas.
Die wedstryd in Kimberley begin om 13:00, waarna die kragmeting in Bloemfontein om 15:30 afskop. Die Griquas en Cheetahs het reeds voor verlede naweek se vier wedstryde hul plekke in die uitspeelrondes verseker. Die Pumas en Lions het egter steeds alles gehad om voor te speel in die laaste ronde van die ligafase.
Albei spanne het hul halfeindrondeplekke met oortuigende oorwinnings beklink, terwyl die Sanlam Boland Kavaliers se kanse om deur te dring ongelukkig Sondag daarmee heen was.
In krieket: Die Protea-ster, Marizanne Kapp, het Krieket Australië se besluit om die Indiese transgender speler, Anaya Bangar, vanaf Maart volgende jaar op elitevlak in vrouekrieket toe te laat, as absoluut belaglik bestempel.
Die dogter van die voormalige Indiese speler Sanjay Bangar, sê die besluit het haar nuwe hoop gegee nadat sy gevoel het asof sy haar krieketdroom verloor het, terwyl sy ook sê haar geslagsverandering hou volgens haar geen voordeel teenoor haar teenstanders in nie.
Bangar hoop om eendag in die Australiese Big Bash-vroueliga en die Indiese WPL te speel en haar land te verteenwoordig, maar sê dit sal afhang van die IKR se toekomstige riglyne.
En, in gholf-nuus: Tiger Woods se bestuurslisensie is vir vyf jaar opgeskort nadat hy geen beswaar gemaak het op aanklagte van mindere nalatige en roekelose bestuur na ‘n omrol-ongeluk in Florida in Maart nie.
Woods het aanvanklik aanklagte van bestuur onder die invloed in die gesig gestaar, maar dit is laat vaar nadat owerhede vasgestel het dat hy nie gedrink het nie, hoewel hy onder die invloed gelyk het en twee hidrokodoonpille in sy besit gevind is.
‘n Regter het die 15-malige major-kampioen gewaarsku dat bestuur tydens die skorsing tot onmiddellike gevangenisstraf kan lei.
Comments