MIDDAG SPORT: Die Eagles versterk hul aanspraak op ‘n halfeindstrydplek, dramatiese gholf-eindstryde lewer drie kampioene op en Marokko se sokkerspan is deur na die kwarteindronde
- Saamgestel deur Jana Roos
- Jul 6
- 2 min read
In rugby-nuus: Die Dotsure SWD Eagles het hul greep op die eerste plek in die Carling Currie-beker se Eerste Divisie verstewig met ‘n oortuigende oorwinning van 87-17 oor die Border Bulldogs in George, terwyl Oostelike Provinsie hul hoop op ‘n halfeindstrydplek laat opflikker het, met ‘n sege van 22-12 oor die Griffons in Gqeberha.
Die Luiperds het hul skraal hoop op uitspeelwedstryde lewend gehou deur die Valke met 48-45 te klop in ‘n opwindende wedstryd in Potchefstroom, met die stryd om die oorblywende halfeindstrydplekke wat eers in die laaste ronde beslis word. Die Eagles bly onoorwonne boaan die punteleer met 20 punte, gevolg deur die Oostelike Provinsie met 15, die Valke met 13, die Griffons met 11, die Luiperds met 10 en Border wat steeds sonder punte is.
Volgende naweek se laaste rondte sluit ‘n kragmeting tussen die Eagles en Oostelike Provinsie in George in, terwyl Border teen die Luiperds te staan kom en die Valke die Griffons ontvang.
In gholf-nuus: Michael Hollick het die BMW-Ope in München met ’n arend op die laaste putjie gewen om Hennie du Plessis met een hou te klop, terwyl albei Suid-Afrikaners ook vir die Britse Ope op Royal Birkdale gekwalifiseer het.
Padraig Harrington het sy derde Amerikaanse Ope vir seniors gewen nadat hy Stewart Cink met vier houe geklop het en sodoende Miller Barber se rekord van drie titels geëwenaar het.
In die John Deere Classic in Illinois het Chris Gotterup ’n agterstand van vyf houe uitgewis met ’n slotronde van 62 om sy vierde PGA-titel in die afgelope 12 maande te beklink. Hollick het agt-komma-twee miljoen rand vir sy oorwinning verdien, terwyl Du Plessis vyf-komma-drie miljoen rand ontvang het, en Gotterup het sy emosionele sege saam met sy broer Patrick, wat as sy joggie opgetree het, gevier.
En, in Wêreldbeker sokker-nuus: Marokko het die eerste span geword wat ‘n plek in vanjaar se toernooi se kwarteindrondte bespreek het, danksy ‘n 3-0 oorwinning oor Kanada.
Ons skakel oor na ons korrespondent vir meer oor hierdie en ander onlangse wedstryde...
LUISTER HIER:
Comments