MIDDAG SPORT: Die Springbokke is bekommerd oor Hanekom se fiksheid, die Proteas verwelkom sleutelspelers terug vir hul toetse teen Bangladesj en Hamilton sê Leclerc werk nie saam nie
Ons skop af met rugby-nuus: Die Springbokke monitor Cameron Hanekom se fiksheid nadat die Bulls-losskakel Saterdag in die wedstryd teen die Scarlets teen rustyd die veld verlaat het weens 'n rugbesering.
Dit het afrigter Johan Ackermann genoop om hom as 'n voorsorgmaatreël te onttrek met die oog op die Nasieskampioenskap-toer.
Die Springbokgroep het reeds Cheslin Kolbe, Andre Esterhuizen, Handré Pollard, Deon Fourie en Eben Etzebeth vir die Europese toer verloor, terwyl die Stormers-haker, Bongi Mbonambi, ook 'n dyspierbesering opgedoen het, wat sy beskikbaarheid onseker maak. Geen plaasvervanger is vir Hanekom aangekondig nie, maar hy sal na verwagting steeds saam met die groep reis, terwyl die Springbokke voorberei om Saterdag teen Italië te speel.
In krieket-nuus: Temba Bavuma sal ’n Protea-groep van 15 spelers lei in ’n reeks van twee toetse teen Bangladesj later vandeesmaand.
Die eerste toets vind van 15 tot 19 November by die Wanderers in Johannesburg plaas, gevolg deur die tweede toets van 23 tot 27 November by SuperSport Park in Centurion. Tony de Zorzi en Anrich Nortje keer terug nadat hulle onderskeidelik van dyspier- en liesbeserings herstel het, met Zubayr Hamza ook in die groep ingesluit, maar Lungi Ngidi is steeds onbeskikbaar, aangesien hy voortgaan met sy rehabilitasie.
Afrigter, Shukri Conrad, sê die span sal die voorbereidingstyd voor die eerste toets gebruik om op die beste kombinasie te besluit.
En, in motorsport-nuus: Lewis Hamilton het Charles Leclerc gekritiseer ná hul onderlinge stryd in die openingsronde van die Mexikaanse Grand Prix en Ferrari se kans op ’n eerste en tweede plek in die wiele gery het.
Die twee jaers het by die vierde draai van die baan afgeraak, waarna Leclerc voor Hamilton teruggekeer het en Max Verstappen die geleentheid benut het om tussen die Ferrari-motors in te skuif, terwyl Leclerc later ’n tydstraf van vyf sekondes ontvang het omdat hy ’n voordeel uit die voorval gekry het.
Hamilton, wat uiteindelik agter Verstappen geëindig het, sê dit is moeilik wanneer ’n spanmaat teen jou werk en beklemtoon dat albei jaers as ’n span moet saamwerk, terwyl Ferrari-spanhoof Fred Vasseur ook sy frustrasie uitgespreek het.
Vasseur wil eers met albei bestuurders praat voordat hy die saak aanspreek, terwyl Leclerc erken dat hy die baan afgesny en ’n straf verwag het, maar sê dat Verstappen se tussenkoms die situasie bemoeilik het.
Comments