OGGEND SPORT: Erasmus verduidelik Grobbelaar se uitsluiting, Boer lei ‘n jong Springbok-vrouesewesspan en, Liverpool struikel terwyl Como Kampioeneliga-geskiedenis skryf
Ons begin met rugby: Springbok-afrigter, Rassie Erasmus, sê daar is niks verdags agter die feit dat die Bulls-haker, Johan Grobbelaar, nie in die groep vir die Nasieskampioenskap-toer ingesluit is nie.
Erasmus het die 28-jarige se werksetiek en bydrae agter die skerms geprys en hom beskryf as ’n sterk aanspraakmaker op die span se Speler van die Jaar-toekenning, alhoewel hy dikwels nie in die kollig staan nie.
Hy het verduidelik dat die afrigtingspan hulself wou uitdaag deur Malcolm Marx, Jan-Hendrik Wessels en Marco van Staden saam te neem op toer, eerder as om Grobbelaar as ’n vierde keuse-haker saam te neem wat dalk glad nie speeltyd sou kry nie.
In vroue-rugby: Vianca Boer sal as kaptein optree vir die Springbok-vrouesewes-‘A’-span tydens die naweek se Rugby Africa-vrouesewestoernooi in Kenia, waar Suid-Afrika in Groep A teen Zambië, Zimbabwe en Rwanda te staan sal kom.
Hoofafrigter, Cecil Afrika, het ’n onervare groep gekies, met Boer, Jané Mulder, Shanidiné Bezuidenhout en Owami Mohuli wat waardevolle internasionale ervaring na die span bring, terwyl vier spelers onlangs vir die Junior Springbok-vrouespan uitgedraf het.
Afrika sê die keuse is gegrond op vermoë, houding, toewyding en dissipline, terwyl die toernooi ’n geleentheid bied om jonger spelers te ontwikkel, met die oog op die 2027-seisoen vir volgende jaar se HSBC SVNS 2-reeks.
En, in sokker-nuus: Liverpool se foutlose Kampioeneliga-rekord het tot 'n einde gekom met 'n 3-2-nederlaag teen Fenerbahce in Türkiye, terwyl Como 'n merkwaardige 9-1-oorwinning in 'n wegwedstryd teen Lens behaal het, wat die grootste telling in die kompetisie se geskiedenis ewenaar.
Real Madrid het hul foutlose rekord behou nadat hulle van 'n agterstand af teruggekom het om AEK Athens met 3-2 te klop, terwyl Arsenal vir Slavia Prague met 2-1 in 'n wegwedstryd verslaan het en Manchester City het RB Leipzig met 3-2 geklop danksy 'n laat wendoel deur Erling Haaland.
Elders het Borussia Dortmund vir Real Betis met 2-1 geklop, Club Brugge het PSV Eindhoven met dieselfde telling verslaan, Porto het hul eerste punte ingesamel met 'n 4-1-oorwinning oor Napoli, en Viking Stavanger het ook 'n 4-1-oorwinning teen Sabah behaal.
Comments