MIDDAG SPORT: Die Springbokvroue berei voor vir Wallis, Pollock oorweeg ‘n toekoms buite Northampton en Pakistan word beboet vir hul stadige boultempo
Ons begin met rugby-nuus: Die Springbokvroue het hul voorbereiding vir Vrydag se openingswedstryd in die WXV-wêreldreeks teen Wallis by Cardiff Arms Park verskerp, ná ‘n produktiewe oefensessie Maandag in Cardiff.
Die medeafrigter, Laurian Johannes-Haupt, sê die fokus was op duidelikheid en wedstrydsimulasie, al het sommige spelers nog die uitwerking van hul lang reis vanaf Kaapstad via Dubai gevoel, terwyl die groep ook by nat en winderige toestande moes aanpas.
Felicia Jacobs wat reeds in 2019 haar toetsdebuut teen Wallis in Cardiff gemaak het, het by die groep aangesluit nadat Anacadia Minnaar nie kon reis nie, terwyl die Springbokvroue-span vir Vrydag môre aangekondig word.
Suid-Afrika het slegs twee van hul ses ontmoetings met Wallis gewen en hulle sedert 2010 nie weer geklop nie, maar Johannes-Haupt sê die geleentheid om teen een van die wêreld se topspanne te speel, is presies waarom hulle deel van die wêreldreeks wou wees.
LUISTER HIER:
Steeds by rugby: Engeland se agtsteman, Henry Pollock, sê hy staan oop daarvoor om oorsee te speel of selfs ‘n ander sport te probeer, terwyl samesprekings oor ‘n nuwe kontrak met Northampton voortduur.
Die 21-jarige, wie se huidige kontrak tot aan die einde van die 2026/27-seisoen strek, sê rugby bly sy prioriteit, maar hy wil graag geleenthede in lande soos Frankryk of Japan ondersoek.
Pollock, wat deur sportpromotor Eddie Hearn se Matchroom Talent Agency verteenwoordig word, sê hy ervaar geen bykomende druk omdat Hearn sy waarde op meer as ‘n miljoen pond skat nie, en hy glo rugby moet verandering omarm.
Northampton se direkteur van rugby, Phil Dowson, hoop steeds om Pollock te behou en sê die onderhandelinge is kompleks, maar die speler wil bly en die klub wil hom behou.
En, in krieket-nuus: Pakistan is beboet met 50 persent van hul wedstrydfooi en het 11 punte in die Wêreldtoetskampioenskap verloor weens ‘n stadige boultempo tydens hul derde toetswedstryd teen Engeland in Birmingham.
Die Internasionale Krieketraad het bevind dat Pakistan 11 boulbeurte agter die vereiste tempo was tydens Engeland se eerste beurt van 453 lopies op Edgbaston. Die straf volg nadat Pakistan ‘n 3-0-nederlaag in die reeks gely het tydens ‘n chaotiese toer wat die afdanking van hoofafrigter, Sarfaraz Ahmed, halfpad deur die reeks en die uitsetting van sewe spelers ingesluit het.
Met hierdie punteverlies staan Pakistan op slegs vyf punte uit nege Wêreldtoetskampioenskap-wedstryde en beklee hulle die laaste plek op die punteleer.
Comments