MIDDAG SPORT: ‘n Voormalige All Black sluit as mentor by die Sharks aan, Pogačar wen sy vyfde toer en Coetzee palm nog ’n medalje in

Ons begin met rugby-nuus: Die voormalige All Black-senter Ma’a Nonu sluit by die Sharks as ’n spelmentor aan. SuperSport berig die Suid-Afrikaanse span het die nuus die afgelope naweek amptelik aangekondig.

Die tweemalige Wêreldbeker-wenner verlaat Toulon, waar hy op 44-jarige ouderdom die oudste speler geword het om in die Franse Top 14 te speel. Die Sharks se verklaring meld nie of Nonu sal voortgaan om rugby te speel en of hy uit die sport tree nie.

Volgens die Sharks sal Nonu die volgende paar maande in Durban deurbring as deel van ’n hoëprestasie-mentorskapprogram. Die program is daarop gemik om die ontwikkeling van die klub se volgende generasie spelers te versnel deur hulle bloot te stel aan een van die suksesvolste leiers in wêreldrugby.

Die Sharks sê Nonu sluit hoofsaaklik in ’n mentorskap- en leierskapsrol by die klub aan. Hy sal saam met die afrigtingspan werk om spelerontwikkeling te ondersteun en die klub se hoëprestasie-kultuur verder te versterk.

In fietsry: Tadej Pogačar van Slowenië het vir 'n vyfde keer die Tour de France gewen en daarmee die rekord geëwenaar. Mathieu van der Poel het die 21ste en 'n opwindende laaste skof in Parys gewen. Die 27-jarige Sloween het vyf skofte gewen in vanjaar se Grand Tour wat op 4 Julie in Barcelona begin het, en die geel trui gedra sedert sy oorwinning in die sesde skof in die Pireneë.

En, in atletiek-nuus: Pieter Coetzè het sy tweede goue medalje by die Statebondspele in Glasgow in die 200 meter rugslag gewen, en nog 'n Statebond-rekord verbeter. SABC-nuus berig sy tyd was een-minuut-54-komma-twee-twee sekondes.

Coetzè se laaste item is die 100 meter rugslag - die item waarin hy die wêreldkampioen is. Vroeër het Aimee Canny Suid-Afrika se tweede silwer medalje van die Spele gewen in die eindronde van die 100 meter borsslag. Olivia Nel het brons gewen in die 100 meter rugslag.

Ter illustrasie. FOTO: Wix