MIDDAG SPORT: Taylor keer terug om die All Blacks te lei, die vroueklubkampioenskap keer terug en, Messi is op koers om Eldense oor te neem
Ons begin met rugby-nuus: Die ervare haker, Codie Taylor, is teruggeroep as kaptein van Nieu-Seeland vir Saterdag se vierde toets teen Suid-Afrika in Baltimore, met afrigter Dave Rennie wat nege veranderinge aanbring.
Taylor vervang die beseerde kaptein Ardie Savea en sal ’n heeltemal nuwe voorry saam met Ethan de Groot en Fletcher Newell lei, terwyl Patrick Tuipulotu, Ethan Blackadder, Peter Lakai en Tupou Vaa’i ook by die pak vooraan aansluit.
Richie Mo’unga vervang Ruben Love op losskakel, Josh Moorby kom in vir Leroy Carter op die vleuel en Anton Lienert-Brown vervang Quinn Tupaea op senter in Nieu-Seeland se poging om die reeks van vier toetswedstryde gelyk te maak.
Die All Blacks loop in die reeks met 2-1 agter teen Suid-Afrika, terwyl die wedstryd in Baltimore by die M&T Bank-stadion deel uitmaak van pogings om rugby se profiel in die Verenigde State te laat groei in die aanloop tot die Wêreldbeker in 2031.
Die tweede Betway-vroueklubkampioenskap vind vanaf 20 September in Alberton plaas en bou voort op pogings om vroue-rugby op voetsoolvlak regoor Suid-Afrika te laat groei.
Sestien toonaangewende klubspanne, wat al 15 provinsiale unies verteenwoordig, asook die verdedigende kampioene, Kwaru, sal oor drie wedstryddae op 21, 23 en 25 September meeding, met die spanne wat in twee afdelings van agt verdeel word, op grond van verlede jaar se ranglys.
Kwaru het in 2025 geskiedenis gemaak deur die eerste kampioene te word nadat hulle Walker Babes, die verdedigende Boland-kampioene wat die titel reeds vier keer gewen het, met 17-14 in die eindstryd geklop het.
Wedstryde in die Premierafdeling sal op die eerste twee dae regstreeks op SuperSport en SA Rugby se YouTube-kanaal uitgesaai word.
En, in sokker-nuus: Lionel Messi het in beginsel ingestem om die meerderheidsaandeelhouer van die Spaanse tweedeliga-klub Eldense te word, wat sy tweede belegging in Spaanse sokker sal wees.
Die 39-jarige Inter Miami-voorspeler besit reeds die klub Cornella, wat in die vierde liga speel en wat hy in April oorgeneem het. Die transaksie is steeds onderhewig aan finale wetlike en kontraktuele prosedures, insluitend ‘n deeglike ondersoek en goedkeuring deur Spanje se sportraad.
Eldense, wat in 1921 gestig is, sê dat geen finansiële besonderhede of voltooiingsdatum tans bevestig kan word nie, en sal verdere ontwikkelings aankondig sodra al die vereiste prosedures en magtigings afgehandel is.
Comments