Minister vra samewerking tussen Vrystaat en MMM

Suid-Afrika se minister van menslike nedersettings, Thembi Simelane, raai die Vrystaatse Departement van Menslike Nedersettings en Mangaung Metro Munisipaliteit (MMM) aan om beter saam te werk. Netwerk24 berig Simelane het die departement in die Vrystaat en die MMM toegespreek as deel van ’n landwye prestasie-evaluering. Terwyl talle uitdagings behuisingsprojekte vertraag, is Simelane onder meer ontevrede oor kontrakteurs en amptenare wat toegelaat word om die publiek teleur te stel met onvoltooide projekte. Sy meen ’n bydraende faktor daartoe is dat die provinsiale regering en die munisipaliteit afsonderlik werk. Die Vrystaatse LUR, Teboho Mokoena, het op die minister se voorstel geantwoord dat die uitdagings aangespreek word deur die aanstelling van nuwe en betroubare kontrakteurs, gereelde monitering en verslagdoening.