Ministers onderneem om skoolgebaseerde geweld aan te pak

Die minister van basiese onderwys, Siviwe Gwarube, en die minister van polisie, Senzo Mchunu, sê Suid-Afrikaanse skole sal nie meer misdaadtonele onder hulle toesig wees nie. Eyewitness News berig beide ministers het hulself tydens die bekendstelling van die Veiliger Skole-protokol verbind tot 'n werksverhouding om geweld in skole te bekamp. Ten minste 28 moorde in en om skoolterreine is regoor die land in die 2023/24-boekjaar aangemeld. Volgens Gwarube is die toename in gewelddadige voorvalle by skole kommerwekkend. Sy voeg by sigbare polisiëring, deursoeking en beslagleggings, asook personeelkeuring is van die aksies wat hulle sal neem om veiligheid by skole te verseker.