'n Begrafplaas word tuiste vir meer as 400 mense

‘n Begrafplaas in Durban het die tuiste van meer as 400 mense geword, met sommige families wat plakkershutte direk op grafte bou. Dit het vrae laat ontstaan oor die gebruik van land, die waardigheid van die oorledenes, en die groeiende nood van die haweloses in dié metro. Volgens IOL het die KwaZulu-Natalse LUR vir Vervoer en Menslike Nedersettings, Siboniso Duma, gesê begrafplase is geheiligde plekke waar oorledenes in vrede moet rus. Hy het egter die komplekse dinamika agter die besetting van die begrafplaas erken, insluitend verstedeliking en ‘n tekort aan behuising en land. Sy departement gaan nou studies loods oor dié demografie, om ‘n program van stapel te stuur om die leeftoestande van plaasbewoners te verbeter deur die voorsiening van behuising, water, elektrisiteit, toegangspaaie en ekonomiese geleenthede.