'n Bejaarde Vrystater is buite sy huis vermoor

Bothaville-speurders in die Vrystaat ondersoek ’n saak van moord nadat 'n bejaarde man buite sy huis in die nywerheidsgebied aangeval en vermoor is.

Volgens 'n polisieverklaring het ’n man, wat homself as die slagoffer se broer geïdentifiseer het, hulle Sondag na 'n ’n wit Isuzu enkelkajuitbakkie geneem. Die bakkie se deure was oop en bloedspatsels binne-in die voertuig. Die slagoffer, Petrus Janse van Rensburg, is ’n paar meter van die voertuig af gevind.

Janse van Rensburg het teen die heining van ’n pakhuis gelê en was met bloed bedek. Hy het verskeie steekwonde aan sy regterarm, bors en die regterkant van sy nek gehad. Twee musse is naby sy liggaam gevind.

Noodmediese dienste het Janse van Rensburg op die toneel dood verklaar.

Die motief vir die moord is tans onbekend, en niemand is nog in hegtenis geneem nie.

Ter illustrasie. FOTO: Unsplash