'n Beweerde veediefstalsindikaat is in die Vrystaat onderskep

’n Beweerde veediefstalsindikaat is deur die Thaba Nchu Misdaadvoorkomingseenheid onderskep.

Volgens 'n polisieverklaring van sersant Mahlomola Kareli het hulle 'n wenk ontvang oor vermoedelik gesteelde vee wat by ’n woonperseel in Ramakgari-lokasie aangehou word. Met hul aankoms op die toneel het die span 17 lewende beeste in die erf ontdek. Verdere inspeksie van die perseel het getoon dat een geslagte koei reeds in ’n yskas gestoor is. Die vleis is gekonfiskeer en die lewende beeste is na die plaaslike polisiestasie vir veilige bewaring en identifikasie vervoer.

Drie verdagtes – 'n man en ’n vrou, wat die huiseienaars is, asook nog 'n man – is op die toneel in hegtenis geneem vir die besit van vermoedelik gesteelde eiendom en veediefstal. Voorlopige ondersoeke het die vee verbind met ’n plaas in die Tweespruit-gebied, waar die eienaar 35 beeste oornag as gesteel aangemeld het.

Pogings is aan die gang om die oorblywende vee op te spoor en vas te stel of die verdagtes met ander veediefstalsake in die distrik verbind kan word.

Die verdagtes sal na verwagting binnekort in die Thaba Nchu-landdroshof verskyn.

FOTO: Verskaf