’n Bloemfonteinse apteker ontvang dubbele nasionale erkenning
’n Bloemfonteinse apteker het dubbele nasionale erkenning ontvang vir haar bydrae tot pasiëntsorg en die veilige gebruik van medisyne.
Volgens ’n mediaverklaring is dr. Martlie Mocke-Richter deur die Suid-Afrikaanse Aptekersraad as die algehele wenner van die National Pioneer Pharmacy Professional Award aangewys. Sy het ook die toekenning in die kategorie Public Sector Institutional Pharmacist ontvang.
Die toekennings is tydens ’n gala-aand by die Durbanse Internasionale Konferensiesentrum oorhandig. Dit is slegs die vierde keer dat die algehele toekenning in die geskiedenis van die Suid-Afrikaanse aptekersberoep toegeken word.
Mocke-Richter se werk sluit kliniese farmasie, navorsing en die bevordering van veilige medisynegebruik in, asook pogings om antimikrobiese weerstand te bekamp.
Sy sê die toekennings beklemtoon ook die belangrike rol wat aptekers speel om wetenskaplike kennis in veiliger behandeling, beter gesondheidsuitkomste en betekenisvolle verandering in pasiënte se lewens te omskep.
Comments