‘n Direkteur en ’n senior administrasieklerk is aan bedrog en geldwassery skuldig bevind

’n Senior administrasieklerk en die direkteur van ’n motorhandelaar is aan bedrog en geldwassery skuldig bevind.

Volgens die Vrystaatse Valke is die uitspraak in die Bloemfonteinse landdroshof gelewer.

Tydens verskeie veilings by die Staatsmotorhuis in Bloemfontein is 18 voertuie aan MNS Cars se direkteur, Mohammed Cajee, vir meer as R1.7 miljoen in 2023 verkoop.

Hy het ’n deposito van R150 000 betaal, waarna die voormalige administratiewe klerk by die Staatsmotorhuis, Jeanne Kellerman, die voertuie aan hom vrygestel het voordat die uitstaande bedrag betaal is.

Sy het ook na bewering sekuriteitspersoneel mislei om die voertuie vry te stel.

’n Ondersoek deur die Valke se Ernstige Korrupsie-ondersoekspan het verder aan die lig gebring dat Kellerman R10 000 van haar medepligtige ontvang het.

Vonnisverrigtinge sal op 13 Oktober hervat word.

Ter illustrasie. FOTO: News24