'n Grootvlei-gevangene se hofverskyning veroorsaak weer verwarring

Saamgestel deur Nadia Pieters
6 hours ago
1 min read

Verwarring het weer ontstaan oor die hofverskyning van Gysbert Jan Maritz, wat tans drie lewenslange vonnisse in die Grootvlei-gevangenis in Bloemfontein uitdien vir seksuele misdrywe teen minderjariges.

Volgens Vista is verwag dat Maritz Dinsdag in die hof in Welkom sou verskyn op aanklagte van bedrog. Sy prokureur het egter gereël dat hy eerder in Bloemfontein verskyn om nuwe datums vir die saak vas te stel.

Die reëling is glo getref sonder die kennis van hofamptenare in Welkom, en is nou vir September geskeduleer.

Dit is nie die eerste keer dat daar probleme rondom Maritz se hofverskynings is nie. By twee vorige geleenthede het hy nie in die Welkom-hof verskyn nie omdat die nodige dokumentasie vir sy vervoer vanuit die Grootvlei-gevangenis nie betyds gereed was nie.

Maritz staan tereg op aanklagte van onder meer bedrog, diefstal, geldwassery en oortredings van die Wet op Regspraktyk.

Die aanklagte hou verband met beweerde bedrog van sowat R15 miljoen wat verband hou met 'n oorledene se boedel en 'n tender wat deur die Matjhabeng-munisipaliteit toegeken is.