’n ICC-lasbrief hou Poetin weg van die G20-beraad

Die Russiese president, Vladimir Poetin, sal nie die G20-leiersberaad in November in Johannesburg bywoon nie. News24 berig dat die direkteur-generaal van die Departement van Internasionale Betrekkinge en Samewerking, Zane Dangor, dit bevestig het ná die eerste G20-ministeriële vergadering in Nasrec, Johannesburg. Suid-Afrika sal, soos met die BRICS-beraad in 2023, voldoen aan die Internasionale Strafhof (ICC) se lasbrief vir Poetin se inhegtenisneming oor beweerde oorlogsmisdade. Dit sou Pretoria verplig om hom in hegtenis te neem as hy die beraad bygewoon het. Poetin het die BRICS-beraad aanlyn bygewoon, terwyl president Cyril Ramaphosa in 2024 na Rusland gereis het vir die BRICS-beraad in Kazan. Hierdie besluit kom te midde van geopolitieke spanning tussen Suid-Afrika en die VSA oor beweerde anti-Amerikaanse standpunte.