'n Man is sittend met 'n noodlottige steekwond gevind

'n Man van Phahameng naby Bultfontein in die Vrystaat is op die grond sittend, sonder reaksie, met ’n noodlottige steekwond in sy bors aangetref. Hy is op die toneel deur nooddienspersoneel dood verklaar.

Polisiewoordvoerder, sersant Palesa Thabana, sê in 'n verklaring volgens getuies was twee vriende in die slagoffer se plakkershut toe die familie gehoor het hoe die verdagte iets van die slagoffer vra. ’n Paar oomblikke later het hulle ’n gil uit die hut gehoor. Met ondersoek het hulle glo die slagoffer op die bed aangetref, bloeiend uit sy bors.

Toe hulle die verdagte vra wat gebeur het, het hy van die toneel gevlug. Die verdagte is opgespoor en daarna deur die polisie in hegtenis geneem.

Die verdagte sal na verwagting more in die Bultfontein-landdroshof op ’n aanklag van moord verskyn.

Ter illustrasie. FOTO: Pexels