'n Man sit lank nadat hy 'n polisiebeampte se wapen steel

’n Man is tot ’n effektiewe 40 jaar tronkstraf gevonnis omdat hy ’n polisiebeampte geskiet en sy dienswapen gesteel het.

Nova News berig Petrus Mankhadi is deur die Bloemfonteinse streekhof gevonnis ná ’n reeks gewelddadige voorvalle wat in Augustus 2024 begin het.

’n Polisie-sersant het pas sy skof voltooi toe hy deur Mankhadi by ’n spaza-winkel in Maokeng naby Kroonstad genader is. Ná ’n woordewisseling het Mankhadi die beampte van sy dienswapen ontneem en hom in die hand geskiet voordat hy met die vuurwapen gevlug het.

Later dieselfde dag het Mankhadi ’n saamrygeleentheid na Bloemfontein gekry. Hy het ’n vuurwapen uitgehaal en probeer om die bestuurder se hande met ’n selfoonlaaier vas te bind. Die slagoffer het ontsnap en hulp by die Mangaung-polisiestasie gaan soek.

Mankhadi se vlug van die gereg het ’n dag later tot ’n einde gekom toe die Colesberg-polisie op ’n voertuigongeluk op die Petrusville-pad gereageer het. Hy is alleen in die wrak van die gekaapte motor aangetref en was ernstig beseer. Die polisie het ’n vuurwapen in die voertuig gevind wat positief verbind is met die roof van die sersant in Maokeng.

Die hof het Mankhadi op al die aanklagte skuldig bevind en hom tot 20 jaar vir die kaping, 20 jaar vir die besit van ammunisie en 15 jaar vir die onwettige besit van ’n vuurwapen gevonnis. Die hof het gelas dat die effektiewe vonnis 40 jaar is.

Ter illustrasie. FOTO: Pexels