'n Man sê hy is die messias nadat hy met 'n skedel betrap is

Saamgestel deur Ilde Roos
Dec 21, 2025
1 min read

Die Bloemfonteinse polisie het ‘n man in hegtenis geneem wat na bewering moord gepleeg het en sy slagoffer onthoof het om, volgens hom, te bewys hy is “die messias”.

Die man is Saterdagmiddag by die stormwatertonnel onder die Central Park Complex gevind waar hy kaal in die stroom lê met ‘n skedel in sy hande. Hy is onmiddellik in hegtenis geneem.

Verdere ondersoek het gelei tot die vonds van ‘n groot klip met stukke been, vlees, en breinmateriaal langs die N8 naby Nathan-straat in Ou Oos-Einde. ‘n Onthoofde liggaam is ook nie ver daarvandaan nie gevind.

Volgens ‘n polisieverklaring van luitenant-kolonel Thabo Covane is ‘n saak van moord geopen, met ‘n bykomende klag van die skending van ‘n liggaam. Die verdagte sal binnekort in die Bloemfonteinse landdroshof verskyn.