‘n Man wat beweer sy kar was gesteel moet nou hof toe

’n Bloemfonteiner is hegtenis geneem nadat hy ‘n vals kapingsaak by die polisie aangemeld het.

Volgens ’n mediaverklaring van die polisie het die man aanvanklik beweer hy is by sy huis aangeval en bewusteloos geslaan, waarna sy motor gesteel is.

Hy het die volgende dag ’n saak by die Bloemspruit-polisiestasie oopgemaak, maar ondersoeke het later gewys dat die voertuig by ’n vriend se huis was.

Die vriend het aan die polisie gesê die man het die motor daar gelos ná ’n ongeluk terwyl hy glo onder die invloed van alkohol was.

Die verdagte het tydens sy inhegtenisneming erken dat hy nie die waarheid gepraat het nie en is van meineed aangekla.

Hy sal na verwagting Maandag in die hof verskyn.

Die Vrystaatse polisiekommissaris waarsku dat die maak van vals sake nie net hulpbronne mors nie, maar ook aandag wegneem van werklike slagoffers, en sê oortreders sal streng vervolg word.

FOTO: Verskaf