'n Nuwe belasting ter befondsing van swart ekonomiese bemagtiging word voorgestel

Saamgestel deur Ilde Roos
Jul 20
1 min read

Voormalige Reserwebank-adjunkgoewerneur Kuben Naidoo het entrepreneur Alan Knott-Craig se voorstel vir 'n nuwe belasting of vrywillige heffing ter befondsing van swart ekonomiese bemagtiging (SEB) ondersteun.

Daily Investor berig Knott-Craig stel voor dat ondernemings 'n heffing van 3% op hul omset betaal, wat hulle in ruil daarvoor 'n Vlak 3 B-BBEE-sertifikaat sal gee. Hy verkies omset bo wins omdat dit moeiliker is om te manipuleer, aangesien wins deur rekeningkundige keuses verminder kan word.

Knott-Craig sê dit sal verseker dat ondernemings wat deur vroue, jongmense en persone met gestremdhede besit word, billike geleenthede in staatskontrakte ontvang.

Business Day berig dat Naidoo se voorstel is dat ondernemings hul maatskappybelasting met 5% verhoog om sowat R5 miljard per jaar in te samel. Hy meen ondernemings wat dié bykomende belasting gereeld betaal, behoort van ander SEB-verpligtinge vrygestel te word.

Volgens Naidoo behoort die geld tussen staatsfinansieringsinstellings en Suid-Afrikaanse banke verdeel te word, en banke sal hulle daartoe verbind om die geld aan ondernemings in swart besit, asook besighede in townships en landelike gebiede, te leen.