’n Pa het glo sedert 2019 sy dogters in Welkom verkrag

’n Man sal na verwagting,op Dinsdag 29 April 2025, in die Welkom-landdroshof verskyn op aanklagte van die beweerde verkragting van sy twee dogters, sestien en twintig jaar oud. Luidens ’n polisieverklaring word daar beweer dat hy sedert 2019 die kinders met ’n vuurwapen gedreig en seksuele dade met hulle gepleeg het. Dié bewerings word nou voor die hof gebring. Welkom-polisie het op Donderdag die verdagte buite ’n huis in Welkom opgespoor en in hegtenis geneem. Die bewerings is onlangs aan die lig gebring nadat een van die slagoffers in Winburg met haar ma gepraat het. ’n Saak van verkragting is geopen en die ondersoek sal voortduur.