‘n Seldsame swampatogeen is by ‘n Bloemfonteinse hospitaal geïdentifiseer

Mediese personeel aan die Universiteit van die Vrystaat (UV) en die Nasionale Gesondheidslaboratoriumdiens by die Universitas Akademiese Hospitaal in Bloemfontein het die eerste geval van ‘n seldsame swampatogeen, S. oblongispora mukormikose, onder MIV-pasiënte in sub-Sahara Afrika geïdentifiseer. Die infeksie het 'n hoë sterftesyfer, veral by pasiënte met onderliggende risikofaktore, en is geïdentifiseer toe 'n 32-jarige man wie se regterkant van sy gesig opgeswel het, in die Universitas Akademiese Hospitaal opgeneem is. Luidens ‘n aanlyn artikel sê ‘n senior lektor en patoloog wat die swam geïdentifiseer het, Dr. Bonita van der Westhuizen, hierdie ontdekking beklemtoon die teenwoordigheid van hierdie swampatogeen in 'n streek waar dit voorheen ondergerapporteer of nie herken was.