’n Tienerseun is glo by 'n internasionale kinderpornografienetwerk betrokke

Saamgestel deur Ilde Roos
1 hour ago
1 min read

’n Tienerseun is na bewering betrokke by 'n gewelddadige internasionale kinderpornografienetwerk.

Die 16-jarige is Maandag in Malmesbury in die Wes-Kaap in hegtenis geneem vir die toegang tot, besit, fasilitering en aflaai van materiaal oor seksuele misbruik van kinders.

Maroela Media berig dit volg nadat intelligensie van die Amerikaanse federale speurdiens (FBI) en die Amerikaanse nasionale sentrum vir vermiste en uitgebuite kinders (NCMEC) opgevolg is.

Volgens die nasionale polisiewoordvoerder, luitenant-kolonel Amanda van Wyk, sal die verdagte se elektroniese toestelle omvattende forensiese ontleding ondergaan om die volle omvang van die beweerde oortredings te bepaal. Dit bevat glo eksplisiete beelde en video’s van die seksuele misbruik van kinders en diereverminking.

Van Wyk sê 'n aantal kinderslagoffers is tot dusver geïdentifiseer, en die moontlikheid van bykomende oortredings oor bedrog en geldwassery word ook ondersoek.