’n Uitbraak van maag- en dermsiekte word by Rhodes-universiteit ondersoek
Rhodes-universiteit in Makhanda in die Oos-Kaap het ’n uitbraak van gastroïntestinale siekte onder lede van sy gemeenskap aangemeld.
Gesondheidsowerhede en omgewingsgesondheidspraktisyns werk daaraan om die moontlike oorsaak van die uitbraak vas te stel.
Die universiteit sê maatreëls is ingestel om veilige drinkwater in eetsale te verseker, en bykomende voorsorgmaatreëls word tydens voedselbereiding toegepas.
Die universiteit doen ’n beroep op enigiemand wat simptome van die siekte ervaar om onmiddellik mediese hulp te kry.
Intussen het nuwe gevalle van gastroïntestinale siekte in Gauteng afgeneem.
Volgens die Tshwane-burgemeester, Nasiphi Moya, het die Dark City-kliniek ook ’n afname aangemeld in die aantal pasiënte wat met simptome aanmeld.
Die stad het die chlorering van die watertoevoer in Bronkhorstspruit hervat.
Moya waarsku inwoners egter om nie kraanwater te drink, mee te kook, te bad of vir ander huishoudelike doeleindes te gebruik nie, aangesien dit steeds onveilig is.
Sy sê 35 watertenkers is tans in die geaffekteerde gemeenskappe in werking, en daar word verwag dat nog een vandag bygevoeg sal word.
Comments