'n UV-prof kry die hoogste pluimpie vir fisika
- Saamgestel deur Ilde Roos
- 2 hours ago
- 1 min read
Die Universiteit van die Vrystaat (UV) se Hendrik Swart is met die land se hoogste eerbewys in fisika bekroon. Die medalje is tydens 'n galadinee by die Suid-Afrikaanse Instituut vir Fisika se 70ste jaarlikse konferensie aan hom oorhandig.
Good Things Guy berig die toekenning word slegs een keer elke twee jaar gemaak om 'n leeftyd van uitnemende prestasies in fisika-navorsing, onderwys en die bedryf te erken.
Swart, wat al vir meer as 40 jaar wetenskap bevorder, jong navorsers begelei en Suid-Afrikaanse fisika internasionaal help vestig, se navorsing fokus op materiaalfisika, veral die manier waarop materiale met lig in wisselwerking tree. Dit sluit in alledaagse tegnologie soos LED-ligte, televisie- en slimfoonskerms, mediese beeldtoerusting, temperatuursensors en selfs sekuriteitskenmerke wat vervalsing van banknote help voorkom.
In sy loopbaan het hy ook die Nasionale Nano-oppervlak-Karakteriseringsfasiliteit aan die UV gebou, wat Suid-Afrikaanse navorsers toegang tot wêreldklastoerusting bied.
