'n Vermeende verkragter is in die hospitaal ná beweerde geval van gemeenskapsgeregtigheid
- Saamgestel deur Ilde Roos
- Jun 3
- 1 min read
’n Man van QwaQwa is na bewering deur gemeenskapslede aangerand nadat hy glo ’n 19-jarige verstandelik gestremde man verkrag het. Die verdagte ontvang tans mediese behandeling in ’n hospitaal onder polisiebewaking.
Volgens 'n polisieverklaring het lede van die gemeenskap die verdagte ná die beweerde verkragting glo aangerand.
Die polisie ondersoek tans sowel die verkragtingsaak as ’n afsonderlike saak van poging tot moord vir die beweerde geval van gemeenskapsgeregtigheid.
Die verdagte is in hegtenis geneem en sal na verwagting in die Tseki-landdroshof verskyn sodra hy herstel het en medies geskik verklaar is om verhoor te word.
Die polisie herinner gemeenskapslede dat 'n burgerlike arrestasie onder sekere omstandighede uitgevoer mag word, maar verdagtes moet dan sonder geweld of besering aan die polisie oorhandig word. Dade van vigilante-optrede en gemeenskapsgeregtigheid is strafbare oortredings.
Comments