'n Vragmotorbestuurder is vas vir die beweerde diefstal van Centlec-kabels

'n Vragmotorbestuurder is in hegtenis geneem nadat hy na bewering in besit gevind is van gesteelde koperkabels en ander items wat aan Centlec behoort.

Volgens 'n mediaverklaring van Centlec is sy veiligheidsafdeling deur ’n anonieme bron ingelig oor ’n vragmotor wat vanaf Bloemfontein na Johannesburg onderweg was en na bewering met gesteelde koperkabels gelaai was.

Die vragmotor is op die N1 naby Glen deur die polisie onderskep, waarna beamptes die voertuig deursoek het. Tydens die inspeksie is 11 groot sakke met verskeie koperkabels daarin gevind, wat as Centlec-eiendom geïdentifiseer is. Die gesteelde items het 'n geraamde waarde van ongeveer R75 000.

Die koperkabels was onderweg vanaf Heidedal na Soweto.

Die verdagte is in aanhouding by die Parkweg-polisiestasie en sal na verwagting in die Bloemfontein-landdroshof verskyn vir ’n borgtogaansoek. Hy staan tereg op aanklagte wat verband hou met die diefstal en vandalisme van noodsaaklike infrastruktuur.

FOTO: Verskaf