'n Vrou weier Standard Bank se olyftak

’n Vrou van Harrismith in die Vrystaat eis ’n volle terugbetaling van Standard Bank nadat byna R60 000 glo uit haar rekening verdwyn het. Sy het die bank se sogenaamde “goeie trou”-aanbod van ongeveer R16 000 as onvoldoende verwerp.

IOL berig Anastatia Radebe sê die geld het in Januarie verdwyn ná ’n reeks transaksies wat sonder haar medewete op haar rekening verwerk is. Toe sy antwoorde gesoek het, het die bank beweer dat die betalings met eenmalige PIN’s (OTP’s) wat aan haar profiel gekoppel is, gemagtig is. Sy betwis hierdie bewering ten sterkste.

Sy vertel sy het vinnig opgetree nadat sy die beweerde bedrog ontdek het, en het ’n saak by die polisie geopen nadat sy haar bank gekontak het.

Standard Bank-woordvoerder Ross Linstrom sê die bank het ’n deeglike ondersoek na die transaksies gedoen. Hy sê die ondersoek het bevind dat die transaksies via die kliënt se eie Standard Bank-banktoepassing op haar geregistreerde mobiele toestel uitgevoer is, en gemagtig is met sekuriteitsbesonderhede wat veronderstel is om slegs aan die kliënt bekend te wees.

Linstrom het volgehou dat die transaksies met Radebe se spesifieke sekuriteitsmaatreëls goedgekeur is, en dat daar geen bewyse van ’n stelselversaking of sekuriteitsbreuk aan die bank se kant is nie.

Ter illustrasie. FOTO: Pexels