‘n Vrystaatse LUR se foon is gekaap

Die Vrystaatse LUR vir Samewerkende Regering, Tradisionele Sake en Menslike Nedersettings, Saki Mokoena, het inwoners gewaarsku dat sy selfoonnommer gekaap is en deur bedrieërs gebruik word.

Central News berig die LUR se kantoor het Vrystaters versoek om enige oproepe, boodskappe of versoeke vanaf die betrokke nommer te ignoreer.

Volgens die kantoor doen bedrieërs hulle as Mokoena voor en belowe hulle onder meer regeringskontrakte of hulp met behuising om mense te probeer mislei.

Die departement beklemtoon dat amptelike kommunikasie oor behuising of kontrakte slegs deur die korrekte regeringskanale geskied.

Die saak is by die owerhede aangemeld en word ondersoek.

Saki Mokoena. FOTO: Facebook