‘n Vrystaatse padprojek se waarborge is glo vervals

Saamgestel deur Nadia Pieters
Jul 17
1 min read

'n Bedrogsaak is teen die voormalige kontrakteur van die Excelsior-Tweespruit-padprojek aanhangig gemaak.

Volgens Netwerk24 sê die Vrystaatse regering die prestasie- en retensiewaarborge wat vir die kontrak ingedien is, was na bewering vervals of het nie bestaan nie.

Die LUR vir gemeenskapsveiligheid, paaie en vervoer, Jabu Mbalula, sê die saak is by wetstoepassingsowerhede aangemeld en word ondersoek.

Hy voeg by die regering sal ook probeer om enige finansiële verliese wat weens die beweerde bedrog gely is, te verhaal.

Volgens die padprojek se projekbestuurder moes die kontrakteur ingevolge die kontrak prestasie- en retensiewaarborge indien voordat werk aan die projek kon begin. Nadat die kontrak beëindig is, is vasgestel dat die waarborge na bewering nie eg was nie.