‘n Vrystaatse polisiesersant se moordenaar kry drie lewenslange vonnisse

Die Vrystaatse Hooggeregshof in Bloemfontein het Afrimino Matola tot drie lewenslange vonnisse vir die moord op die Welkom-polisiesersant Disema Mapane, én die poging tot moord op twee ander beamptes, gevonnis.

IOL berig Mapane is op 6 Desember 2022 doodgeskiet tydens ’n multidissiplinêre polisie-operasie wat gemik was op verdagtes wat met ’n gewapende roof by ’n vulstasie in Welkom verbind is.

Matola is skuldig bevind op verskeie ernstige aanklagte, insluitend moord, twee aanklagte van poging tot moord, die onwettige besit van ’n outomatiese vuurwapen, ammunisie en oortredings van immigrasiewette.

Die Nasionale Vervolgingsgesag in die Vrystaat sê polisie het opgetree op grond van intelligensie wat Matola met die saak verbind het, waarna ’n skietery uitgebreek het.

Matola bly in aanhouding en moet nog teregstaan in ’n afsonderlike kontant-in-transito roofsaak in Limpopo.

Ter illustrasie. FOTO: Wix