'n VS man is swaar gevonnis vir die verkragting van 'n tiener
- Saamgestel deur Ilde Roos
- Apr 10
- 1 min read
'n Man van Bohlokong naby Bethlehem in die Vrystaat is tot lewenslange gevangenisstraf gevonnis vir die verkragting van ’n 16-jarige meisie.
Polisiewoordvoerder, adjudant-offisier Mmako Mophiring, sê in 'n verklaring die beskuldigde het die slagoffer in Februarie verlede jaar opgelaai nadat hy haar langs die pad raakgeloop het. Hulle het mekaar geken, aangesien hy ’n vriend van haar stiefpa was. Hy het later van die roete afgewyk en die slagoffer aangeval.
Die slagoffer het die voorval aangemeld, waarna die polisie ondersoek ingestel en die beskuldigde gearresteer het.
Die hof het die beskuldigde se weergawe, dat die seksuele omgang met toestemming was, verwerp. Die staat het aangevoer dat daar geen wesenlike omstandighede bestaan om van die voorgeskrewe minimum vonnis af te wyk nie, en die hof het hiermee saamgestem.
Die owerhede sê die vonnis stuur ’n duidelike boodskap dat seksuele misdrywe teen minderjariges ernstig opgeneem word en swaar gestraf sal word.
Comments