'n Walvisgeboorte in die natuur word vasgelê

Wetenskaplikes het ’n skouspelagtige gebeurtenis vasgelê wat selde deur mense gesien word: ’n potvis wat geboorte gee terwyl ander wyfies saamwerk om die ma en haar pasgebore kalf te ondersteun.

eNCA berig die geboorte langs die kus van die Karibiese eiland Dominica het sowat 34 minute geduur, waarna die hele groep aktief geraak het en die pasgebore kalf ondersteun en beskerm het. Kalfies word stert-eerste gebore en kan aanvanklik sink, daarom help ander walvisse om hulle na die oppervlak te bring om asem te haal.

Uit 93 spesies walvisagtiges is slegs nege al ooit in die natuur tydens geboorte waargeneem. Nog meer besonders is dat onverwante walvisse die ma gehelp het — iets wat nog nie voorheen gesien is nie. Behalwe vir mense en ander primate, is dit die enigste bekende geval waar diere mekaar tydens geboorte help.

Nadat die geboorte verfilm is, is die groep vir meer as ’n jaar nie weer gesien nie. Die wetenskaplikes sê om die eerste jaar te oorleef, is ’n goeie teken dat die potvis volwasse sal word.

FOTO: eNCA