'n Woedende skare keer beamptes vas

Twee polisiebeamptes en 'n moordverdagte moes uit 'n woedende skare in Ndwedwe in KwaZulu-Natal gered word nadat inwoners hulle vasgekeer en geëis het dat die verdagte aan hulle oorhandig word.

eNCA berig die voorval het gevolg nadat die polisie die man ná 'n twee uur lange soektog in verband met die moord op 'n 22-jarige man in hegtenis geneem het.

Volgens die private veiligheidsmaatskappy Reaction Unit South Africa het die skare die uitgang met betonblokke en staaldromme versper en gedreig om die beamptes aan te val.

Toe die verdagte in 'n polisievoertuig gelaai is, is die voertuig met klippe bestook en is daar glo gedreig om dit aan die brand te steek.

Lede van die veiligheidsmaatskappy, versterk deur bykomende polisielede, het uiteindelik die versperrings verwyder en die beamptes en die verdagte veilig uit die gebied begelei.

FOTO: Skermgreep / eNCA