OGGEND SPORT: De Klerk is gereed vir sy Curriebeker-buiging, Pogacar versterk sy greep op die Tour de France en Spanje behaal die sokker Wêreldbeker-eindstryd

Saamgestel deur Jana Roos
Jul 15
2 min read

Ons skop af met rugby-nuus: Faf de Klerk sal Sondag sy Curriebeker-buiging vir die Cheetahs teen die Leeus in Bloemfontein maak nadat hy met ’n ligte heupbesering gesukkel het, met die span wat Woensdag aangekondig word.

Frans Steyn sê die Cheetahs beskik oor verskeie opsies op losskakel, terwyl Tiaan Swanepoel weens ’n besering nie vir die openingswedstryd oorweeg sal word nie. Steyn verwag ’n uiters mededingende Curriebeker-reeks en meen al die spanne het deeglik beplan, terwyl hy die Leeus beskryf as ’n span vol gehalte-rugbyspelers.

Cheetahs-kaptein, Neels Volschenk, sien die wedstryd teen die Leeus as ’n goeie maatstaf, terwyl die besoekers moontlik ook met voormalige Cheetahs-spelers soos Daniel Kasende en JP du Preez sal uitdraf.

In fietsry: Tadej Pogacar het op Bastille-dag ‘n oortuigende oorwinning in die bergagtige tiende skof van die Tour de France behaal en sy algehele voorsprong bo Jonas Vingegaard tot drie minute en 36 sekondes vergroot.

Die verdedigende kampioen het ‘n beslissende aanval geloods toe daar nog 15-komma-vyf kilometer oor was, en sodoende sy derde skofoorwinning in vanjaar se wedren verseker. Remco Evenepoel het tweede geëindig, 32 sekondes agter Pogacar, terwyl die Franse tiener, Paul Seixas, derde gekom het en ná ‘n indrukwekkende vertoning tot die vyfde plek op die algehele ranglys gestyg het.

Vingegaard het in die skof na die sewende plek teruggesak, Isaac Del Toro het algeheel van die derde na die sewende plek geval, en Pogacar se dominante vertoning het sy greep op die geel trui verder versterk.

En, in Wêreldbeker sokker-nuus: Spanje het ‘n uitstekende algehele vertoning gelewer om die toernooi-gunstelinge, Frankryk, met 2-0 in Texas te klop en hul plek in die Wêreldbeker-eindstryd verseker.

Mikel Oyarzabal het ‘n strafskop in die eerste helfte in die net geplaas, voordat Pedro Porro die oorwinning na rustyd beklink het en Spanje is selfs ‘n derde doel vir ‘n geringe onkant afgekeur.

Die Europese kampioene het die middelveld oorheers en Frankryk se sterbelaaide aanval enige werklike invloed ontsê ten spyte van ‘n paar kanse vir kaptein Kylian Mbappe.

Spanje, wat laas die Wêreldbeker in 2010 gewen het, sal Sondag teen Argentinië of Engeland in New Jersey te staan kom, nadat hulle Frankryk se bod vir ‘n derde wêreldtitel beëindig het.